En materia ferroviaria, el Gobiernu central sigue tando en delda con Asturies no que cinca a les inacabables obres de la Variante de Payares, la penosa situación de la rede de cercaníes, el soterramientu en Llangréu o los planes de víes de Xixón y Avilés. En carreteres, el ministru habría de contanos dalgo concluyente sobre’l sangrante peaxe de l’autopista del Güerna, el desarrollu de l’autovía del Suroccidente o la ronda Norte d’Uviéu. En cuanto a tresporte marítimu, confiamos en que traiga yá un compromisu inversor, a traviés de Puertos del Estáu, pa recuperar l’autopista del mar ente Xixón y la ciudá francesa de Nantes.

Nos casos específicos de los principales conceyos asturianos requierse una reestructuración del sistema de cercaníes, cola estación d’Uviéu como intercambiador central d’Asturies, y obres pa establecer distintes paraes nel conceyu ovetense. Pa Xixón ye fundamental la firma del conveniu de víes, asina como que Puertos del Estáu faiga les correspondientes aportaciones si quier que la Zalia siga esistiendo. Avilés nun tien nenguna conexón, vía Uviéu, pal primer Alvia que parte a diario hacia Madrid nin pal últimu que regresa a Asturies, y Fomento prometió un plan de cercaníes pa resolver esta situación; aparte, l’actual depuradora avilesina de Maqua ta fuera de la normativa europea y ye precisa una inversión de cuasi cuarenta millones d’euros. Siero, pola so parte, necesita actuaciones d’apantallamientu de l’autopista ‘Y’, y na rotonda de la nacional 634 cola carretera SI3, en Granda. Y tamién Mieres reclama barreres acústiques, nesti casu pa l’autopista A-66.

Son munches y de munchu pesu les causes pendientes de l’Alministración del Estáu con Asturies. Prácticamente en tolos casos trátase de problemes heredaos del anterior Executivu del Partíu Popular, pero dempués de cuasi mediu añu al frente del departamentu’l ministru Ábalos supónse que yá tomó tierra pa conocer la situación d’Asturies, ún de los territorios onde más urxentes resulten les actuaciones pa que nun sigamos nel vagón de cola de les infraestructures y del desarrollu económicu. El futuru d’esta comunidá autónoma depende d’ello.