La organización reclama que s’incluya la llingua asturiana nesti importante concursu Iniciativa pol Asturianu denunció va un añu que'l Premiu de Novela Café Gijón, qu'organiza'l Conceyu de Xixón y tien una dotación de 20.000 euros, nun permitiera presentar obres n'asturianu.

Un añu más, y magar la nuesa reivindicación, el concursu vuelve a nun permitir nes sos bases que se presenten obres n'asturianu, lo que ye ensin dulda una marxinación pal idioma y pa los y les escritores que se manden d'esti idioma.

Ye un drechu llingüísticu que la convocatoria seya también n’asturianu y reclamamos al Conceyu de Xixón que se faiga la modificación precisa nes bases pa que o bien, se cree una categoría pa obres n'asturianu o bien, se permita la presentación d'obres nel idioma que les Ordenances d'Usu del Asturianu de Xixón recueyen como propiu.

El Conceyu de Xixón tien un exemplu perbonu bien cerca, nel Conceyu de Villaviciosa, qu'esti añu pasáu, dempués de faer una convocatoria d'un concursu de rellatos namás pa obres en castellán y tres la nuesa quexa y propuesta, facía'l cambiu y convertíalu nun certame pa rellatos n'asturianu.

Esta ye una midida de costu cero, yá que nun supondría añadir un mayor presupuestu del yá aplicáu, y que daría un importante prestixu a les obres lliteraries n'asturianu pues pasaría a ser el concursu nesti idioma con una mayor dotación.

Iniciativa pol Asturianu pide por otra vegada, tanto al equipu de gobiernu como a les fuercies presentes nel plenu, qu'impulsen esta reforma y el Premiu Café Gijón seya una forma más de potenciar la creación lliteraria, y con ello, sofitar el procesu de normalización social del idioma, acabando asina con esta discriminación que fai que dende va cuasi trenta años los autores nun puedan presentar obres n'asturianu.