El Trasiegu Fest anuncia la so programación completa

El festival va desendolcase mientres los díes 18 a 24 de setiembre nos conceyos de Bimenes, Cabranes, Colunga y Sariegu. El Trasiegu Fest yá ye una realidá. El festival de la cultura sidrera asturiana contemporánea ta acabante de confirmar tola programación que, mientres una selmana, va enllenar cuatro conceyos de la Comarca de la Sidra d’una amplia ufierta cultural na que nun va faltar de nada.

El gran eventu del festival van ser los conciertos. Per una parte, la nueche del vienres 22 va ser el tiempu del grupu folklóricu Trebeyu, que va entamar una nueche en mayanza na plaza del conceyu de Santolaya de Cabranes. Per otra parte, la nueche del sábadu va ser musical. A partir de les 18:30 y hasta les 02:00 de la madrugada Luis Nuñez y Los Folganzanes, Algaire, La Tarrancha y Llevólu’l Sumiciu van poner a baillar a tolos presentes. A lo último, la mañana del domingu va tar dedicada a la reciella. A les 12:00 hores ye’l momentu de Mestura, mientres qu’a les 13:00 hores David Varela va dar un conciertu didácticu familiar na Casa de Cultura de Santuyano, nel conceyu Bimenes.

D’otra manera, les actividaes que se van realizar van tar destinaos a tolos públicos. Son munches les propuestes que se pueden alcontrar nel programa del eventu. Estos son dalgunos de los planes que vas poder atopar nos conceyos onde se celebre’l Trasiegu Fest.

- Charra didáctica al rodiu de la sidra impartida por Llucía Marqués: Con esta charra didáctica preténdese averar la cultura sidrera a la xente mozo, faciendo que conozan les diferentes fases del frutu y los procesos d’ellaboración y la creación d’una identidá alredor d’esti productu. Too ello acompañáu d’una esperiencia sensorial na que los participantes van poder comprobar los diferentes procesos.

- Concursu d’escritura sidrera: Col oxetivu de promover la escritura, fadráse un concursu de rellatos improvisaos pa tolos públicos nos que la temática d’estos seya la sidra y la cultura que xira alredor d’ella. Los ganadores van recibir productos venceyaos a la cultura sidrera y el xuráu va tar formáu por personalidaes de la lliteratura y l’estudiu de la sidra. Va haber dos categories: una pa los menores de 18 años y otra pa los mayores de 18 años.

- Concursu-esposición de semeyes sidreres: Nel mesmu espaciu que la realización del concursu d’escritura sidrera, va facese la esposición del concursu de semeyes sidreres, nel que fotógrafos aficionaos y profesionales van poder participar mientres les selmanes anteriores al entamu del festival. D’esta manera, fadráse una entrega conxunta de premios ente los dos concursos na tarde del vienres, tres aconceyar los xuraos de dambos certámenes.

- Taller de cocina sidrera: El domingo va entamase un taller de cocina nel que productu principal seya la sidra, pero onde tamién tean presentes otros productos de la tierra y la mar asturiana. D’esta mena, va celebrase esti eventu nel Palaciu del Marques d’Estrada, en Martimporra, conceyu de Bimenes.

- Mesa redonda. Muyeres, motor del mundu sidreru: Delles muyeres que trabayen nel mundu de la sidra van crear un alderique sobre les sos perspectives y los pasos que se pueden dar pa meyorar la situación d’esti sector. Mesmo que’l taller de cocina sidrera, va celebrase’l domingu nel Palaciu del Marques d’Estrada, en Martimporra, conceyu de Bimenes.

- Mesa redonda. Nuevos caminos na cultura sidrera: Va esplorase les nueves formes nes que se trabaya alredor de la cultura sidrera dientro del turismu, la industria, la economía circular con trabayadores y trabayadores d’estos sectores.

- Mesa redonda. L’asturianu, llingua sidrera: L’asturianu ta bien presente na cultura sidrera. Poro, nesta mesa va aldericase sobre’l potencial que tien l’usu d’esta llingua nel mundu sidreru.

- Mesa redonda. Presente y futuru de la DOP Sidra d’Asturies: La importancia de la DOP Sidra d’Asturies ye esencial nel futuru y nel presente de la cultura sidrera asturiana. Poro, va aldericase sobre l’importante llabor que fai l’órganu regulador al rodiu del consumu y la promoción d’esta cultura.

- Mesa redonda. La sidra y les artes: La sidra y la so representación nes artes ta venceyada dende va sieglos. D’esta manera, nesta mesa redonda va afondase nes posibilidades y nel tratamientu que la sidra y la so cultura tien nes artes.

- Performance d’Ánxel Nava: L’artista Ánxel Nava fadrá nes cais de Cabranes una actividá artística alredor del mundu de la sidra.

- Teatru de cai: Averando un actu tradicionalmente al entornu urbanu, mientres la tarde del sábadu va llevase a cabu un teatru de cai en Cabranes, nel que La Buelga Animación va proponer una interpretación sidrera.

- Tastia de sidra de gala: L’actu últimu del Trasiegu Fest va ser una tastia de sidra de gala, poniendo’l ramu a unes xornaes al rodiu de la cultura sidrera asturiana.